 Naxçıvan - Sədərək magistral yolun genişləndirilməsi nəticəsində yol kənarında yerləşən kəndlərin əhalisinə ciddi ziyan dəyir. Yolun tikintisi zamanı plana düşən kənd sakinlərinin mülkiyyətində olan daş hasarlar, tövlələr, hamamlar, evlərin bir hissəsi sökülür, meyvə ağacları kütləvi şəkildə kəsilir. Mülkiyyətinə ziyan vurulan əhaliyə isə heç bir kompensasiya ödənilmir. Habelə tikilən yol Şərur rayon Zeyvə kəndində yaşayış evlərinin 5-15 metrliyindən keçir və ağır tonnajlı maşınların daima magistralla hərəkəti əhalinin narahatlığına səbəb olur, evlər silkələnir, hətta bəzi evlərin divarlarında çatlar əmələ gəlir. Həmçinin yol kənarında yerləşən həmin evlərin əhalisi ağır şəraitdə yaşayır. Məlumatı RATİ-nin Naxçıvandaki bölgə müxbirlərinə zərər çəkmiş bir qrup Şərur rayon Zeyvə kənd sakin bildirib. Müxbirlərimiz həmin ərazidə olaraq hadisəni araşdırıblar. “59-cu ildən bu ev tikilib. Evimizin və həyətyanı sahəmizin sənədləri qaydasındadır. Lakin bir həftə bundan əvvəl “Gəmiqaya” şirkətinə məxsus bir neçə işçi gəlib həyətimizdə işarə vurublar. Bildiriblər ki, yol buradan keçəcək. Onların işarələmələrinə görə evimin hasarı, tövləm, dükanım, hamamım, su quyusu və torpaq sahəmiz əlimizdən alınır. Bütün bunların müqabilində bizə kompensasiya da vəd edilməyib. Yol isə evin 2-3 metrliyindən keçəcək. Bu isə ailəmizin həyatı üçün də təhlükə yaradır. Əvvəllər də bir neçə dəfə burada yol qəzası olub. Qəza nəticəsində maşın aşaraq həyətimizə düşüb. Ailəmiz 6 nəfərdən ibarətdir. Yalnız anam təqaüd alır. Mən isə işsizəm. Ara-sıra Türkiyədə gedib işləyirəm. İqtisadi cəhətdən vəziyyətimiz çox ağırdır. Yəni, mənim başqa yerdə tikinti aparmaq, ev almaq imkanım da yoxdur. Haqqımı tələb etdiyim üçün də mənə daima mənəvi-psixoloji təzyiqlər edilir . Əgər dövlət bizə dəymiş ziyanı ödəməsə ailəmin burada yaşaması mümkün olmayacaq. 3 körpə uşağım və anamla birlikdə küçədə qalacağıq”. Bunu RATİ-nin müxbirlərinə Nazim Mahmudov bildirdi: “Ailəmə və vəziyyəti ağır olan Şərur rayon Zeyvə kəndinin sakinlərinə köməklik göstərilməsi üçün Azərbaycan Respublikasının prezidentinə, Milli Məclisə, bütün aidiyyatı olan qurumlara və insan haqlarını müdafiə edən bütün təşkilatlara müraciət edirəm”, - deyə N.Mahmudov bildirdi. Zeyvə kəndinin sakini Sədaqət Rzayevanın isə bildirdiyinə görə, o 10 yaşlı oğlu ilə birlikdə yaşayır. Onların da evlərinin və torpaq sahələrinin bir hissəsi magistral yolun tikintisi üçün əllərindən alınacaq. Uzun müddətdir ki, yaşadıqları evlər su içindədir. Azyaşlı oğlu və özü xəstəlikdən əziyyət çəkir. Evlərinin nəm zirzəmisindən isə tez-tez müxtəlif həşəratlar çıxır. Hər gün qorxu içində yatıb qalxırlar. Dəfələrlə aidiyyatı orqanlara müraciət etsələr də heç bir nəticəsinin olmadığını qeyd etdilər. Müxbirlərimiz Zeyvə kəndində olarkən onlarla sakin onlara müraciət edərək eyni problemlərlə üzləşdiklərini, çarəsiz vəziyyətə düşdüklərini bildiriblər. Müxbirlərimiz həmin sakinlərin yaşadıqları ünvanlarda da olaraq həqiqətən mülkiyyətlərinin əllərindən alınmasının şahidi olublar. Məsələ ilə bağlı Zeyvə kənd İnzibati Ərazi üzrə İcra nümayəndəsi Rasim Məmmədova müraciət etdikdə isə, o, mülklərin kim tərəfindən söküldüyünü, kompensasiyanın verilib-verilməyəcəyi ilə bağlı yaranmış sualı cavablandırmağa çətinlik çəkib: “Bu haqda məlumatım yoxdur. Lakin zirzəmilərdən suyun təmizlənməsi və dezinfeksiya olunması üçün göstəriş verilib. Bir neçə gün ərzində bu istiqamətdə tədbir görüləcək”. Magistral yolun tikintisi ilə məşğul olan “Gəmiqaya” MMC şirkətindən isə, əməkdaşlarımıza bildirilib ki, onlar yalnız yolun tikintisi ilə məşğuldurlar və əhalinin mülkiyyətinin hansı şirkət tərəfindən söküldüyü və onlara kompensasiyanın verilib-verilməyəcəyi barədə məlumatsızdırlar. Xatırladaq ki, Naxçıvan-Sədərək magistral yolunun tikintisi 2008-ci ilin fevral ayının 10-dan başlanıb və bu ilin sonuna qədər 86 km yolun tikintisinin başa çatdırılması nəzərdə tutulur. Artıq yolun böyük bir hissəsi tikilib. E. Abbasov H. Mehdiyev |
