Nakhchivan

24 dekabr 2008-ci il tarixdə Sədərək rayon Heydərabad qəsəbəsi sakinləri Vəliyev Afiq, Həsənov Elvin, Yaqubov İlkin, Əhmədov Elməddin , Əhmədli Qalib, Kərəm Eldaroğlu və Önal Vətənoğlu Sədərək rayon Polis Şöbəsinə aparılaraq işgəncəyə və mənəvi-psixoloji təzyiqə məruz qoyulub.

Məlumatı RATİ-nin Naxçıvan bölgə müxbirinə işgəncəyə məruz qalmış gənclərin anaları bildiriblər. Onların dediyinə görə, 24 dekabr axşam saat 21.00 radələrində övladlarını Sədərək rayon Polis Şöbəsinin cinayət axtarışı bölməsinin rəisi Anar Əliyev evdən çağıraraq şöbəyə aparıb. Bir saat keçdikdən sonra gənclərin valideynləri Polis Şöbəsinə gedərək övladlarının nədən ötrü saxlanıldığını soruşublar. Rəis müavini Dağbəyi Ələkbərov bildirib ki, guya gəncləri  Heydərabad qəsəbəsində quraşdırılmış yeni il yolkalarından birinin işıqlarının sıradan çıxardıqları üçün saxlayıblar.

Gənclər 25 dekabr səhər saat 11.00-a qədər şöbədə saxlanılıb. Sərbəst buraxılan  gənclərdən saat 18.00-dan sonra küçəyə çıxmamaq haqda iltizam alınıb. Valideynlərinin sözlərinə görə, onlara şöbənin rəisi Fariz Məmmədov, rəis müavini Dağbəyi Ələkbərov və Anar Əliyev işgəncə verilib. Polis qayçı ilə gənclərin saçlarını kəsilərək onlara mənəvi-psixoloji təzyiq də edib.

Baş verənlərlə bağlı valideynlər Azərbaycan Respublikasının prezidenti İlham Əliyevə, Muxtar Respublika Daxili İşlər Naziri Əhməd Əhmədova şikayət ərizəsi ilə müraciət ediblər. Valideynlər İlham Əliyevdən atası Heydər Əliyevin adını daşıyan Heydərabad qəsəbəsində qanunları pozan polis işçilərinin cəzalandırılmasını tələb edirlər. Əks təqdirdə analar Azərbaycan vətəndaşlığından imtina edəcəklərini bildiriblər.

Hadisə ilə bağlı Sədərək rayon polis şöbəsinin rəisi Fariz Məmmədovla görüşdükdə isə o, RATİ əməkdaşlarına bildirib ki, həqiqətən adları çəkilən gəncləri Polis Şöbəsinə dəvət edilib, dindirildikdən sonra evlərinə buraxılıblar.

H. Mehdiyev

E. Abbasov